खोटाङ । खोटाङमा एयर डाइनेस्टीको हेलिकप्टर दुर्घटनामा परेको छ। दुर्घटनामा मानवीय क्षति नभए पनि एक जना स्थानीय घाइते भएका छन्।

प्रमुख जिल्ला अधिकारी रेखा कँडेलका अनुसार आज भएको उक्त दुर्घटनामा हेलिकप्टर क्षतिग्रस्त भएको छ, तर यात्रु र चालक दल सुरक्षित रहेका छन्।

केपिलासगढी गाउँपालिका–२ बालावेशीमा मंगलबार दिउँसो १२ बजेर २ मिनेटमा एयर डाइनेस्टीको 9N-AAHQ हेलिकप्टर अवतरणका क्रममा दुर्घटनामा परेको हो। जिल्ला प्रहरी कार्यालय खोटाङका अनुसार पाइलट सविन थापा र पाँच जना यात्रु सवार हेलिकप्टर हावाको तीव्र वेगका कारण अनियन्त्रित भई भित्तामा ठोक्किएर पल्टिएको हो।

प्रहरीका अनुसार हेलिकप्टर काठमाडौंबाट एक परिवारलाई लिएर आएको थियो। तर, प्रमुख जिल्ला अधिकारी कँडेलले भने हेलिकप्टर शव बोकेर आएको जानकारी दिएकी छन्। घटनाबारे आधिकारिक विवरणमा केही फरक सूचना सार्वजनिक भएको छ।

दुर्घटनाका क्रममा हेलिकप्टर अवतरणस्थल नजिक रहेका स्थानीय ५० वर्षीय काजीबहादुर राई घाइते भएका छन्। उनलाई एयर डाइनेस्टीकै अर्को हेलिकप्टरमार्फत उपचारका लागि काठमाडौं पठाइएको प्रहरीले जनाएको छ।

पाइलट सविन थापासहित अन्य यात्रुको अवस्था सामान्य रहेको जिल्ला प्रहरी कार्यालय खोटाङले जनाएको छ।